Ne tenê nakokiya PDK û Bexdayê ye
Hemû jî li ser helwest û reftarên xwe yên tirsonek li hember Kurdistanê û daxwazên rewa yên gelê Kurd hemfikir in..
Hişyar Sîweylî
Dema ku ez dibêjim Bexda, mebesta min ew elîta siyasî ya serdest li Bexdayê ye ku çavê xwe li refaha Hewlêrê nagire.
Ramana vê elîtê dirêjkirina ramana wan kesên beriya wan e ku nav, kirin û dîroka wan di quntara dîrokê de derketiye. Yên ku bi Enfala Kurdan ranewestiyan û Bexda kirin paytexta diziya sedsalê û di yek talan û diziyê de nêzî du milyar û nîv dolar talan kirin û tenê kesek sûcdar hat girtin û piştre hat berdan.
Zîhniyeta ku Iraq xiste nav sê şerên navneteweyî di nava kêmtirî 15 salan de, bi milyonan kes hatin kuştin û wêraniyeke mezin ji bo Iraqê bû. Niha zîhniyeta ku desthilatdariya Bexdayê dimeşîne, dixwaze saetê li ser dema Enfal û kîmyabaranê bizivire û Kurdistanê wêran bike û gelê wê birçî bike.
Axir, eger îmkana wêrankirina Kurdistanê, birçîbûn û rûreşkirina ferdê kurd tune be, çima ew bûdceyek ku bi qanûnê ji bo Kurdistanê hatiye veqetandin, ji bo pêkanîna armancên şovenîstî û jinavbirina Kurdistanê bibe çekek siyasî? Çi mentiq e ku mehane nêzîkî 1 milyar dolar ji firotina nefta Kurdistanê winda bibe, tenê ji bo ku Kurdistan sûdê wernegire?
Di vî şerê siyasî, aborî û destûrî de ne tenê PDK bûye hedef, tevahiya gelê Kurd û pêşeroja vê herêmê bi metirsiyeke mezin a hebûnê re rû bi rû ye. Em ji bîr nekin ku elîta siyasî li Bexdayê li ser gelek tiştan di navbera xwe de li hev nakin, lê hemû jî li ser helwest û reftarên xwe yên tirsonek li hember Kurdistanê û daxwazên rewa yên gelê Kurd hemfikir in.
Werin em tevî nakokiyên xwe yên siyasî û hizbî, li ser platforma parastina wan berjewendiyan, bi berjewendiyên bilind ên neteweyî re bibin yek.
